واحد الراجل خارج من لوزين، وهو يتعرض ليه واحد الشفار هلكو مزيان وخدا ليه الخلصة ديالو
من بعد 15 يوم، كان الراجل خارج عاوتاني من لوزين، وهو يتعرض ليه نفس الشفار
يالله بغى يعطيه قتلة ديال العصا تاني، وهو يقول ليه الراجل: حبس أخويا، هاك الخلصة ديالي، بلا ما تضربني
شد من عندو الشفار الفلوس، وبقا عليه حتى سلخو
قال ليه الراجل: الله يا خويا، عطيناك الفلوس وهلكتينا
قال ليه الشفار: أنا ندي شي حاجة بعرق كتافي
النـــكــتــة 2
واحد المكلخ سولوه: أشنو هو أهم أسباب الطلاق؟
فكر المكلخ شوية وقال ليهم: الجواج
النـــكــتــة 3
هادا واحد الشيفور كان غادي بالكار وجالسة مرا شارفة ف القدام
شوية عطات ليه المرا الشارفة شي لوز، وهو ياكلو
شوية تاني، عطات ليه المرا الشارفة شي لوزات وكلاهم
المرة التالتة، مدات ليه المرا الشارفة اللوز، وهو يقول ليها: بارك الله فيك أ الوالدة، ولكن خلي لراسك شوية د اللوز
قالت ليه المرا الشارفة: لا أوليدي، راني ما عندي سنان، وبركة عليا كنمص السكلاط اللي داير بيهم
النـــكــتــة 4
هادوا تلاتة ديال الصحاب تفارضو فدجاجة محمرة وشراوها
منين جاو ياكلوها مالقاوش الخبز، ناضو صيفطو واحد منهم يجيب ليهم الخبز
تسناوه ساعة ما جاش
تسناوه ساعتين ما جاش
تسناوه تلت سوايع ما جاش
طلع ليهم الدم، وقالوا صافي عيق، ملي يجي ياكل هو الخبز
وهو نيت يخرج ليهوم من مورا الباب، وقال ليهم: شفتوا كون مشيت؟
النـــكــتــة 5
واحد الولد قال لأمه: مي، محتاجك تمشي معايا غدا للمدرسة
قالت ليه أمه: علاش أولدي؟
قال ليها الولد: قال لينا الاستاد اليوما، اللي ما جاش داير التمارين غدا غادي نضرب مو
النـــكــتــة 6
هادا واحد معصب ما كيحملش يعاود الهدرة جوج مرات
مشى عند واحد الحانوت قال ليه: عندك الحليب؟
قال ليه مول الحانوت: لا
مشى المعصب عند حانوت اخر وقال ليه: و نتا؟
النـــكــتــة 7
واحد سكران مشى لدارو
لاحت ليه مرتو الساروت، وتلف على الثقبة ديال الباب
غوت عليها قال ليها: لحتي الساروت إيوا لوحي التقبة
النـــكــتــة 8
واحد الغليض مشى عند الطبيب وقال ليه: بغيت ندير ريجيم، تقهرت بهاد الغلض
قال ليه الطبيب: كول نص خبزة ف الفطور، ونص خبزة ف الغدا، ونص خبزة ف العشا
قال ليه الغليض: واش قبل الماكلة أولا بعد منها؟
النـــكــتــة 9
أستاذ ديال الإنجليزية قال لواحد التلميد: دير ليا
She has
في جملة مفيدة
قال ليه التلميذ : شي هاز اللحم وشي هاز الهم
النـــكــتــة 10
هادي واحد المرا كبيرة وحشومية بزاف مشات تقرا ف محو الأمية
وكان العنوان ديال الدرس : دخل أحمد، خرج أحمد
ملي تقول المعلمة: دخل أحمد، كدير المرا الزيف على راسها
وملي تقول المعلمة: خرج أحمد، كتحيد المرا الزيف على راسها
ملي مشات للدار، قال ليها راجلها: آشنو قريتو اليوم؟
قالت ليه: علاه احمد خلانا نقراو؟ ها هو داخل، ها هو خارج
النـــكــتــة 11
واحد مبوق قاعد قدام التلفزة وكيضحك
قال ليه صاحبو: مالك؟
قال ليه المبوق: دابا هادي تلفزة، و ملي كنسد عيني، كتولي راديو
النـــكــتــة 11
هادا واحد الكداب كيعاود لصاحبو : مشيت أنا و مراتي لافريقيا، وڭلسنا فواحد لوطيل حدا الغابة
فالصباح، ڭلت لمراتي لبسي نهبطو نتساراو، لبسات مراتي حوايجها ف خمسة الدقايق وهبطنا
شوية خرج ليا سبع وانا نضربو بكروشية مات، زدنا وانا نلقا خمسة د السبوعة آخرين
بديت نضرب، ها اللول، ها التاني، ها التالت، وهوما يجيو ڭاع الحيوانات
وانا نطلع فوق الشجرة و بديت كنشير عليهم حتى قتلتهم كاملين
ورجعنا للوطيل، وانا نلقى سبع آخر
...
هنا بدا صاحبوا كيموت بالضحك
سولو الكداب: مالك أصاحبي كضحك؟
ڭال ليه صاحبو: ماحشمتيش تكذب؟ مراتك لبسات ف خمسة الدقايق
النـــكــتــة12
هادا واحد الاستاد كيعلم لواحد التلميد عملية ناقص، قال ليه: جوج ناقص جوج شحال تيبقى ؟
التلميد : معرفتش
الاستاد جبد ليه جوج كرواصات، وقال ليه : شحال هادو؟
التلميد :جوج كرواصات
الاستاد :هاك كول هادي، زيدك هادي، شنو بقى دابا ؟
التلميد: شي بـرّاد ديال اتاي بعقلو
النـــكــتــة13
علي وبراهيم تشاركوا ف حانوت
واحد النهار، ناض علي علق على الحانوت پلاكة مكتوب عليها بالفرنسية
Alimentation générale
جاء براهيم قرا الپلاكة وكعا، وهو يبدلها ودار فيها
النـــكــتــة14
هادو رباعة ديال المكلخين عندهم حفرة فالحومة، ناضوا تجمعو باش يلقاو شي حل
قال ليهم واحد: نديروا شي فرملي ف الحفرة، باش اللي طاح فيها يداويه ف البلاصة
قال ليهم واحد اخر: لا نجيبو لابيلانص حدا الحفرة، باش اللي طاح نديوه فيساع للسبيطار
هدر واحد اخر: نريبوا داك السبيطار، ونبنيو واحد اخر
ناض واحد قال ليهم: وا لا! خاصنا نسدو هاديك الحفرة...
ونحفروا وحدة أخرى قدام السبيطا
النـــكــتــة15
جوج برغوتات كانوا ف الحمام
وحدة قالت لصاحبتها: نمشيو على رجلينا أولا نشدو كلب؟
النـــكــتــة16
واحد السيد ديما كتعايرو مرتو: الناس كاع مشاو للطاليان، ونتا باقي هنا
هو يقول ليها: شوفي، أنا غادي نجلس فالدار واحد الشهر، واللي يسولك علي، قولي ليه مشى للطاليان
قالت ليه واخا
اللي يسولها كتقول ليه راجلي مشا للطاليان
واحد النهار، سمع ولدو ضربو شي واحد ف الزنقة
هو يطل من الشرجم، وقال ليه: واخا عليك حتى نرجع من الطاليان ونوريك
النـــكــتــة17
واحـد السيد نسيبــتو دارت كسيدة ضرباتــها طومـوبــيل
سولــوه : هــي دارت كسيدة وانت مال شـــلاقـــمك كـــحلين ؟
قــــال ليهم : شبـــعت بوســـان في الروايـــض
النـــكــتــة18
المعلم طلب من التلاميد يكتبو إنشاء كل واحد يتخيل راسو مدير شركة.
كلشي بدا كيكتب إلا واحد، ربّع يديه وبدا كيتعنكر
جا عندو المعلم وسولو: علاش مكتكتبش؟
جاوبو التلميذ: كنتسنى السكرتيرة ديالي باش نملي عليها وهي تكتب
النـــكــتــة19
واحد الموضف بغى يعيط للعساس يجيب ليه أتاي
وهو يغلط ف النمرة وصدق معيط على المدير ديالو
قال ليه: جيب ليا واحد أتاي للمكتب ديالي وطلق راسك أ الحمار
قال ليه المدير: واش عرفتي مع من كتهدر؟
قال ليه الموضف: لا
قال ليه المدير: أنا هو المدير أ الحيوان
قال ليه الموضف: ونتا عرفتي مع من كتهدر؟
قال ليه المدير: لا
قال ليه الموضف: إيوا الحمد لله
وهو يقطع
النـــكــتــة20
الولد: بابا بغيت ناخد كيري
الأب: والله ماتاخد غير بنت عمك طامو
الولد: بابا راه كيري فرماج
الأب: حتى طامو راها زبدة
أش كتعرفو فالزين
النـــكــتــة21
واحد المكلخ كان غادي ولقى 4000 ريال وهو يبدا كيفكر
غادي نعطي 1000 للوالد كايتسالها ليا
و1000 للوالدة كاتسالها ليا
و 2000 اللي كايسالني مول الحانوت
وهو يقول اش غادي يبقى ليا !!!
و الله لا هزيتها
النـــكــتــة22
قررت شرطة المرور تكافئ كل واحد داير حزام السلامة
لقاو واحد مبوق سايق طوموبيلتو وداير الحزام، وعطاوه 2000 درهم
وسولوه: أشنو غادي تدير بهاد الفلوس؟؟
قال ليهم: نزيد عليهم ونمشي ندوز بيهم لبيرمي
النـــكــتــة23
واحد كذاب بززززاف قال لواحد صاحبو:
أنا خلاقيت ملي كان قوس قزح بيض وكحل !!
وهو يرد عليه صاحبو حتى هو طيارة في الكدوب قال له:
انا تزاديت فــاش كان البحر الميت باقي مريض فالسبــيطار
النـــكــتــة24
هادا واحد الراجل دا ولدو للسوق باش يعلم ليه الألوان
ورا ليه ماطيشة وقال ليه: شوف أولدي، هادي ماطيشة وراها حمرة
واخا كتبان ليك صفرة، راه غير باقا خضرة
النـــكــتــة25
هادي واحد الناموسة أول يوم تطير
ملي رجعات للدار، سولاها باها: أشنو كان الشعور ديالك؟
قالت ليه: والله إيلا شعور زوين، كلشي الناس كانت كتصفق ليا
النـــكــتــة26
أستاد د الفرنسية سول واحد التلميد ديالو: كيفاش كنقولو الصراحة راحة بالفرنسية؟
قال ليه التلميد
La vérité rité
النـــكــتــة27
هادا واحد كيجري مورا التران، يطيح وينوض، يطيح وينوض
الناس كاملين اللي راكبين ف التران كيموتوا عليه بالضحك
ناض واحد طل عليه من الشرجم وقال ليه: وبركة أصاحبي، راه قتلتينا بالضحك
قال ليه هاداك الراجل: إيوا دابا تموتوا بالخلعة راه أنا الشيفور
النـــكــتــة28
هادا واحد قرر ينتحر، وهو يطلع فوق باطيمة
مللي شاف التحت بانت ليه جوقة ديال الناس تحت لباطيمة
وهو نيت ينزل يشوف أشنو واقع
النـــكــتــة29
شي وحدين جالسين كايتكيفو.
داز حداهم واحد الشيباني، قال ليهم: حرام عليكم
قالو ليه: وعليكم الحرام
النـــكــتــة30
هادا واحد الراجل كان غادي ف الصحرا، راكب حمار ومعاه كلب
وهوما ف الطريق، هدر الحمار وقال للراجل: واش مازال الطريق بعيدة؟
الراجل تصدم وشداتو الخلعة، أو! حمار كيهدر؟ هي مسكون!
ناض الراجل يجري يجري يجري يجري وتابعو كلبو
ملي عيى وهو يوقف.
وتما قال ليه الكلب: وايني خلعة خلعنا هاداك الحمار
النـــكــتــة31
سولو واحد المحشش : إيلا كان التدخين محرم، أش يكون الحشيش ؟؟
قال ليهوم : احتمال يكون ذو القعدة
النـــكــتــة32
هذا وحد المش مبوق تابع واحد الفار، وهو يهرب ليه وطلع مع القادوس.
تخبى المش ساعة ساعتين ما نزلش ليه الفار.
شوية هو يفكر مزيان وقال: هاو هاو هاو هاو.
الفار قال مع راسو: ما دام الكلب جا إذا المش هرب.
وملي نزل الفار لقى المش كيتسناه وكلاه.
وهو يقول المش مع راسو: الواحد في هاد البلاد إيلا ما كان عندو جوج لغات ما ياكلش طرف الخبز
النـــكــتــة33
هادو تلاتة زقرامين قرروا يتبرعوا بشوية من فلوسهم حيت كترات عليهم الهدرة
قال ليهم اللول: غادي نرسم واحد الدائرة و نلوح الفلوس من الفوق. الفلوس اللي طاحوا ف الداخل ديال الدائرة ديالي. و الفلوس اللي يطيحوا ف برا الدائرة غادي نتصدق بيهم
قال ليهم التاني: أنا غادي نرسم واحد الخط و نلوح الفلوس من الفوق. الفلوس اللي طاحوا على ليمن ديال الخط ديالي، و اللي طاحوا على ليسر ديال الخط نتصدق بيهم
ناض التالت قال ليهم: أنا غادي نلوح الفلوس من الفوق. اللي طاحوا ديالي و اللي بقى ف السما نتصدق بيه
النـــكــتــة34
واحد المعلم رسم للتلاميد ضفدعة و حداها 1 ف السبورة و قال ليهم يقراو ليه أشنو داكشي. شي قال (واحد ضفدعة). شي قال (ضفدعة واحدة) .ما خلاو ما قالوا حتى عياو و هو ينوض واحد الكسول و قال ليه: هاديك
ضفدعتعشر
النـــكــتــة35
هادا واحد مشى للبحر و دا معاه حرشة. جا واحد آخر جاب معاه بيتزا. منين ناض اللول يعوم، التاني تشهى هاديك الحرشة، ناض خداها و حط ليه البيتزا. منين رجع اللول شاف ف هادوك اللي جالسين حدا بلاصته و قال ليهم: شكون تقيى ليا على الحرشة؟
النـــكــتــة36
هادا واحد شدوه البوليس, و سولوه أشنو سميتو، جاوبهم بشويييية :عمر
قال ليه واحد لبوليسي: وا غوّت
و هو يقول ليهم: وااااااااااااااااااااع
النـــكــتــة37
واحد المسموم جرى عليه بّاه من الدار. ناض كتب على باب دارهم: مقر تنظيم القاعدة
النـــكــتــة38
واحد الكلب دايع ف الزنقة داز حدا الكوميسارية و هو يبان ليه واحد شيان بوليس (كلب بوليسي) و هو يقول ف راسو: تفو! كون غير كملت قرايتي
النـــكــتــة39
هادا واحد الراجل صحيح دايما كيمشي عند مول الحانوت و كيقول له :عطيني كوكا ولا ...؟
و مول الحانوت كيخاف منه و كيعطيها ليه بلا فلوس.
جا واحد النهار، مول الحانوت طلع ليه الدم و قال مع راسه و الله اليوم ما نخاف منه و اللي بغى يكون يكون. إيوا جا عنده هاداك الراجل و قال له: عطيني كوكا ولا ...؟
جا مول الحانوت جاوبه :ولا شنو ؟
رد عليه الراجل و قال له: ولا فانتا
النـــكــتــة40
واحد الشفار مسموم دخل لواحد الدار يسرقها و ما لقى فيها والو. ناض اتصل بأمريكا و خلى السماعة مرفوعة و مشى
النـــكــتــة41
هادا اللغز ديال واحد مبوق: إيلا كانت الطوموبيل كتمشي ب ستين كيلومتر ف الساعة ، شحال من حمامة طايرة ف السما إيلا كانت بيبسي ب عشرة د الدراهم؟
النـــكــتــة42
هادا واحد مبوق كيشوف ف صاحبو اللي عندو خالة فوق عينيه, و هي يقول ليه: أربي قول ليا واش هاديك عين عندك أولا غين ؟
النـــكــتــة43
هادا واحد مكلخ، تجمعوا عليه سبعة ديال الشياطين، واحد كيوسوس ليه و ستة كيفهموه
النـــكــتــة44
هادو جوج مبوقين جالسين قدام المراية، و هي يقول واحد فيهم لصاحبه: شوف هادوك الجوج اللي جالسين قدامنا ناض صاحبه و قال ليه: بلاتي نشوف أش كيديرو
و هو يقول ليه لاخور: غير جلس. ها واحد فيهم جاي عندنا
النـــكــتــة45
هادا واحد الراجل كيتسال لواحد شي فلوس شحال هدا وهو غابر عليه. واحد نهار تلاقى معاه قاليه: أرى ليا رزقي اللي كنتسالك
هو يقول ليه لاخر: عرفتي أش دير سير مع هاد الطريق غادي يبان ليك اربع شوارع 1 لا 2 لا 3 لا 4 دخل معاه غادي يبان لك 4 ديال دروبا 1 لا 2 لا 3 لا 4 دخل معاه غادي يبان ليك تاني 4 ديال العمارات 1 لا 2 لا 3 لا 4 دخل معاها غادي تلقا فيها 4 ديال طبقات 1 لا 2 لا 3 لا 4 دخل معاها غادي تلقى 4 ديال البرطمات 1 لا 2 لا 3 لا 4 غادي تلقى 1 سيد دخل معاه غادي تلقى 4 ديال البيوت 1 لا 2 لا 3 لا 4 ايه غادي تلقى 4 ديال المجورى المجر 1 لا 2 لا 3 لا 4 غادي تلقى مصحف جيبو ليا نحلف ليك بللي ماعندي حتى ريال.
0 Comments
